Autoridades políticas, representantes empresariais e da universidade asistiron á inauguración do primeiro edificio da Cidade das TIC da Coruña, situada na antiga fábrica de armas da cidade herculina. Trátase do Centro de Servizos Avanzados (CSA), con plena ocupación de empresas do sector tecnolóxico, segundo se expuxo no acto.

Ao mesmo, asistiron, entre outros, o presidente da Xunta, Alfonso Rueda; o delegado do Goberno en Galicia, Pedro Blanco; a alcaldesa herculina, Inés Rey; o presidente da Deputación da Coruña, Valentín González Formoso; o reitor da Universidade da Coruña (UDC), Julio Abalde, e o presidente do Clúster TIC Galicia, Antonio Rodríguez del Corral.

Todos eles coincidiron en destacar que este proxecto é un “logro colectivo” froito da “unión” das diferentes administracións que “da man” realizaron un “gran esforzo” para facer realidade este “desafío”, así como da “colaboración público-privada”. O presidente da Xunta destacou, ademais, que a formación “diaria, para evolucionar e para que non te superen, necesaria no mundo do TIC, vaise a poder dar neste gran centro que ten que ser o centro de Galicia”. O obxectivo, engadiu, é “especializarnos en tecnoloxías emerxentes para seguir desenvolvendo o tecido empresarial e contribuír á dixitalización”.

Pola súa banda, o delegado do Goberno sinalou que “estamos nunha transformación imparable da nosa economía e do noso tecido produtivo” e fixo fincapé no compromiso do Executivo central de impulsar unha A Coruña “máis dixital, mellor comunicada, máis sustentable e máis inclusiva”. Na mesma liña, a rexedora recalcou que a cidade herculina é “líder en novas tecnoloxías grazas ao seu rico tecido empresarial e universitario”.

RETER TALENTO

Respecto ao Centro de Servizos Avanzados, o presidente da Deputación da Coruña incidiu en que é “un escaparate para que a sociedade internacional saiba que en Galicia o talento non ten que ir a despregarse a outros lugares“. Respecto diso, o reitor da UDC explicou que este proxecto “non vén competir con ninguén, vén para colaborar, complementar e conxuntar os esforzos de toda a comunidade autónoma para que sexa competitiva”.

“O futuro de Galicia pasa por crear postos de traballo que nos permitan reter talento, atraer talento externo e que sexa recoñecida como unha zona innovadora“, dixo. Neste sentido, o presidente do Clúster TIC coincidiu en que nas TIC o investimento “é o talento”. “É caro, é volátil pero a formación avanzada TIC é emprego para toda a vida“, puntualizou.

INSTALACIÓNS

O edificio, de 5.000 metros cadrados, acollerá ás empresas Imatia, Cinfo, ITG, Xoia Extending Reality, Enxenio e Odeene. Albergará, tamén, un ‘showroom’ que funcionará como espazo versátil para o deseño e formación nas últimas tecnoloxías e produtos do sector TIC galego. O Centro de Servizos Avanzados contará, ademais, con tres laboratorios de innovación de uso compartido entre os socios do Clúster TIC Galicia, un de intelixencia artificial, outro de media e un de dispositivos intelixentes, así como un coworking.