O Concello da Coruña convocou o programa ‘A Coruña no mundo: Bolsas USA 2024-2025’ co que 35 estudantes da cidade herculina poderán cursar o ano escolar en Estados Unidos, en réxime de convivencia con familias, para perfeccionar o seu nivel de inglés e vivir unha experiencia de inmersión noutra cultura.
Segundo informa o Consistorio, as bases poden consultarse na súa páxina web e o prazo de presentación de solicitudes está aberto ata o próximo 3 de novembro. As persoas candidatas, engade, deberán estar matriculadas nun centro educativo durante o curso 2023-2024 en 4º de ESO.
O programa educativo municipal inclúe, entre outras cuestións, a estancia (que comezará en agosto do próximo ano e finalizará en xuño de 2025), a escolarización nun centro educativo de EE.UU., a tramitación e obtención do visado de entrada no país, a viaxe e desprazamentos de ida e volta desde A Coruña ata a poboación de destino.
‘A Coruña no mundo: Bolsas USA 2024-2025’, segundo indica o Concello, aumentou a contía destinada a cada participante para a súa estancia durante o curso, por un importe máximo de 120 euros mensuais; e para a preparación da viaxe, por valor de 400 euros. Isto é para “o alumnado de familias que obteñan unha maior puntuación no criterio de situación económica da unidade familiar”.
