O xulgado autorizou á administración concursal a formalizar a favor de Resonac Graphite Spain as escrituras de compravenda de case todos os terreos e instalacións contiguas á súa planta da Grela, na Coruña.

Segundo informou a entidade, son un total de 260.000 metros cadrados de superficie que inclúen as edificacións e o material que albergan, a excepción do parque móbil. Con esta compra, o grupo de matriz nipoa prevé dar “unha segunda vida industrial” a estes activos a través do plan deseñado de forma conxunta coa enerxética Ignis.

Os plans da empresa, de darse as condicións técnicas e económicas necesarias, son desenvolver na superficie dos terreos contiguos un proxecto para facilitar a revitalización da industria da zona a través do aproveitamento da superficie adquirida.

Así mesmo, a operación permitirá triplicar a superficie coa que conta actualmente a planta coruñesa. Nos próximos meses comezarán os traballos de acondicionamento, que será o primeiro paso para a recuperación da actividade industrial.