O deputado do BNG no Congreso, Néstor Rego, esixiu ao Goberno que retire toda a simboloxía, os elementos e as informacións que supoñan un ensalzamiento da sublevación militar e da ditadura Franquista das dependencias do Ministerio de Defensa das cidades de Ferrol e da Coruña.
O Bloque tamén propuxo revisar todo o contido de rótulos e informacións ofrecidas no Museo Histórico Militar para eliminar todo tipo de propaganda franquista e dar unha visión acorde coa realidade histórica, ademais de aproveitar para incorporar o galego nos rótulos e informacións.
“En distintos edificios e dependencias titularidade do Ministerio de Defensa nas cidades da Coruña e Ferrol aínda se poden observar elementos que supoñen un ensalzamiento da ditadura”, criticou Rego, segundo recolle o BNG nun comunicado, que asegura que teñen que ser retirados, como manda a Lei de Memoria Democrática.
A organización nacionalista tamén lembrou que hai numerosos casos de simboloxía franquista nas devanditas cidades, como o escudo coa aguia Franquista na posta do Comandante de Garda no Cuartel de Atocha.
“Desde a deturpación do topónimo da cidade en distintas referencias ata a falta total de rigor histórico en distintas informacións”, lamentou Rego, indicando outros elementos franquistas que alí se exhiben.
