“As veces a dor é máis psicolóxica… Ao ir a unha habitación, agarrarlle a man e falar con el pásalle a dor, cando non lle puxeras ningún calmante”. É a experiencia de Tatiana Díaz Díez, supervisora de consultas externas do Hospital Universitario de A Coruña. Conta isto no novo vídeo do colectivo Solidarios cos maiores dedicado ao acompañamento hospitalario.

Cada ano entran nos servizos de urxencias dos hospitais galegos máis de 900.000 persoas e “moitas chegan soas”, sitúa a xornalista Sabela Romar ao inicio do vídeo. Tatiana Díaz destaca “ese calor e ese apoio que necesitan os maiores”. Desvela algunha mala experiencia “con xente das residencias” que chegan soas ao hospital, as veces nunha ambulancia e resume “síntense moi sós”.

O voluntariado para acompañar a estas persoas é un pequeno pero efectivo remedio segundo din dende o colectivo. Tatiana convida aos pacientes maiores a “que pregunten na Cruz Vermella, o Concello de Coruña, servizos sociais” porque hai persoas que dedican un tempo a prestar este servizo de acompañento hospitalario. En ocasións, manifesta ela, é sinxelamente ir ao hospital e pasear un rato co enfermo por un corredor.