Servizo exemplar o que ofrece Bicicoruña, que está a cambiar, verdadeiramente, a mobilidade da nosa cidade. Feito que se ve diariamente co uso que fan deste servizo os e as adolescentes da cidade, que medran vendo como a bicicleta é un medio de transporte tremendamente efectivo e útil, ademais de sostible.
Pero non todo é perfecto, e xa temos recollidos numerosas queixas, que piden por exemplo máis carrís bicis nas Avenidas da cidade, ou a repartición máis ecuánime entre barrios das aínda insuficientes bicis eléctricas existentes.
Así, un ano e medio despois de se estrearen as novas estacións e as bicicletas eléctricas, dende o BNG invitan ao Goberno Local a facer unha avaliación do funcionamento de Bicicoruña, e levará unha pregunta ao pleno do vindeiro xoves 9N: “Que avaliación fai o Goberno Local do servizo de Bicicoruña?”.
Explícase a concelleira: “Chégannos queixas de persoas usuarias arredor de deficiencias de Bicicoruña. Hai problemas recorrentes nas horas punta -saídas e entradas dos traballos, por exemplo- con estacións baleiras e cónstanos tamén malestar porque con demasiada frecuencia se atopan bicis con rodas que non están nas mellores condicións, algo que se está a ver con clareza nestes días de chuvia”, refire Veira.
Dado que a previsión é que Bicicoruña vai “medrar aínda máis en número de estacións e de bicis eléctricas”, no marco da chamada “terceira expansión” do servizo, cómpre “acompañar ese medre dunha necesaria reflexión sobre os aspectos a mellorar”, considera a concelleira nacionalista. “Estamos a falar dun servizo que é moi útil e que é clave para que se abra paso un novo paradigma de mobilidade na Coruña”, conclúe Veira.
Máis novas
O Goberno autoriza licitar por 18,2 millóns as obras de ampliación de Alfonso Molina
