A sección segunda da Audiencia Provincial da Coruña xulga este martes, 7 de novembro, a un axente da Garda Civil por un delito continuado de furto duns 150 cartuchos de tinta de impresora nun almacén coruñés do corpo para revendelos a través dunha páxina web. O fiscal pide un ano e tres meses de prisión para este garda civil, ademais de abonar ao Servizo de Informática da Xefatura de servizos Técnicos da Subdirección Xeral de Apoio da Garda Civil a cantidade de 799,99 euros na que se taxou os obxectos subtraídos.
Segundo a acusación, o axente, nacido en 1959 e destinado ao Grupo de Apoio ás Tecnoloxías da Información (GATI), fíxose cos cartuchos de impresora durante o primeiro trimestre de 2020. Posteriormente, vendeunos a través dunha páxina web por uns 800 euros. O GATI ten como labor principal proporcionar todo tipo de apoio loxístico ou asesoramento que poidan precisar as unidades que conforman a comandancia da Garda Civil da Coruña e a zona de Galicia no concernente a medios tecnolóxicos, tales como ordenadores, monitores, teclados ou impresoras, entre outros.
