A eurodeputada do BNG Ana Miranda reclamou axudas transitorias para o sector marisqueiro polo dragado da ría do Burgo, tras unha reunión con representantes da agrupación de mariscadoras e mariscadores da Confraría da Coruña. Ademais, sostén que o citado dragado “incumpre os criterios de rexeneración biolóxica ao sementar só dúas especies das catro que corresponden a este espazo, como son a ameixa babosa, a ameixa xapónica, a ameixa fina e berberecho“.

Miranda sinala que esta forma de executar o saneamento da ría do Burgo “por unha banda incumpre a normativa europea ambiental e, por outra, non atende as peticións do sector, que non está a ser tido en conta para levar a cabo a rexeneración deste espazo”. “Instamos a que se fale coa confraría, neste momento tan importante para o futuro do sector extractivo”, sinala Ana Miranda, quen anuncia que solicitará unha visita ao espazo para avaliar os traballos que se están levando a cabo.