Cinco persoas resultaron feridas en dous accidentes de circulación rexistrados na tarde deste venres no municipio coruñés de Cee e en Pontevedra. O sinistro con máis vítimas foi o que tivo lugar en Cee minutos antes das 18,00 horas, onde tres vehículos se viron implicados nunha colisión na parroquia da Pereiriña.
Un dos ocupantes dos turismos tivo que ser excarcerado polos bombeiros de Cee para que puidese ser atendido polos profesionais de Urxencias Sanitarias 061, que tamén trasladaron a un hospital aos outros dous feridos que deixou o accidente.
Minutos antes, dous vehículos protagonizaron unha colisión frontal en Pontevedra á altura de Marcón cando circulaban pola estrada PO-542, segundo trasladou o CIAE 112 Galicia. Os efectivos de emerxencias desprazados ao lugar tras recibir a alerta ás 17,40 horas deste venres tiveron que cortar a porta dun dos coches para poder liberar a unha muller. Neste sinistro tamén resultou ferido o ocupante do outro vehículo.
