Os desafíos que entraña a implantación da intelixencia artificial, os incendios en lugares públicos e as actualizacións normativas para avanzar no ámbito da seguridade privada foron algúns dos temas a debate nunha xornada organizada na Coruña pola Asociación de Empresas e Expertos de Seguridade de Galicia (Aesga).
A cita reuniu a un centenar de persoas procedentes do ámbito empresarial relacionado á seguridade, ademais de representantes públicos como o director xeral de Emerxencias e Interior, Santiago Villanueva, ou a subdelegada do Goberno na Coruña, María Rivas.
Alí, segundo recolle un comunicado da Xunta, o responsable de Interior incidiu na importancia da formación e da actualización de capacidades entre os profesionais do sector da seguridade para que poidan estar preparados ante os “novos retos” e “desafíos” que se presenten. Neste sentido, sinalou as actividades formativas que organiza a Academia Galega de Seguridade Pública (Agasp), que suman máis de 500 no que vai de ano, das cales, 245 son no apartado de seguridade pública e 280 nas emerxencias.
