A alcaldesa da Coruña, Inés Rey, situou o inicio das obras de ampliación da avenida de Alfonso Molina en 2024 e a súa finalización en 2026, tras a adxudicación da obra e a publicación no Boletín Oficial do Estado (BOE) do estudo de detalle para a integración ambiental. “Unhas obras que van pasar de ser históricas a actuais“, remarcou a rexedora nun acto xunto ao candidato socialista á presidencia da Xunta, José Ramón Gómez Besteiro, na zona de Matogrande.

“Moitos anos escoitando falar a outros ministros non socialistas e con goberno local non socialista e na Xunta, que casualidade que todas administracións da mesma cor e non foron capaces de desbloquear esta infraestrutura“, apuntou sobre o PP. Xa sobre a obra indicou que se trata dunha adxudicación por 18 millóns para a ampliación da avenida de saída e entrada á cidade, ao que se suma a publicación do estudo de detalle para a integración ambiental, por importe de 5,5 millóns.

Noutra orde de cousas, e cuestionada polas negociacións co BNG para os orzamentos de 2024, apelou ao “arduo traballo” e instou á “discreción” á espera de que se faga público o resultado das mesmas.