Un total de 47 asociacións recibirán axudas municipais para gastos de funcionamento ou apoio aos seus programas, proxectos e actividades, de acordo coa resolución definitiva do Concello da Coruña das subvencións para entidades sociais por importe de case 100.000 euros.

Segundo informa, xa está dispoñible, na web municipal, a listaxe coa proposta de resolución definitiva das subvencións destinadas a entidades de iniciativa social sen ánimo de lucro que concede o consistorio a través da concellaría de Benestar Social.

O importe total das axudas suma 97.319 euros, que 47 asociacións da cidade poderán utilizar para levar a cabo as súas actividades ou proxectos de interese social no ano 2022.

A finalidade das subvencións é a cooperación en actividades ou proxectos de promoción e reinserción social, a prestación de servizos sociais e, en xeral, as que persigan un interese social no termo municipal da Coruña, a realizar durante o ano 2023.