Os grupos municipais de PSOE e BNG alcanzaron un acordo sobre os orzamentos de 2024, que ascenderán a 375 millóns de euros e que priorizarán os barrios, segundo informaron, en rolda de prensa, a alcaldesa, Inés Rey, e o edil nacionalista Francisco Jorquera, tras a firma do mesmo.
“Uns orzamentos que serán progresistas, necesarios para manter e ampliar o impulso que A Coruña colleu desde 2019”, dixo a rexedora en relación á chegada dos socialistas ao goberno municipal. Ademais, incidiu en que serán “progresitas” porque “buscarán apoiar ao que máis o necesita e mellorar a cidade en todos os seus barrios“.
“E compensar históricos déficits“, recalcou Inés Rey, que aludiu aos acordos para impulsar un plan de mellora e revitalización dos barrios, con actuacións como un plan director no Barrio das Flores ou unha nova biblioteca en Novo Mesoiro, citou, entre outras máis. “Un acordo que inclúe a redacción do plan estratéxico Coruña 2025-2050; un novo plan de mobilidade urbana; aumentar recursos en servizos de axuda no fogar, así como das bolsas comedor”, sinalou tamén.
Pola súa banda, o portavoz municipal do BNG, Francisco Jorquera, manifestou que é “un bo acordo”. Destacou que se “incorporan gran parte das propostas formuladas polo BNG”. “E, sobre todo, son uns bos orzamentos para A Coruña” porque permitirán dotar á cidade duns “orzamentos sociais, comprometidos co reforzo” deste tipo de servizos, aos que sumou a “defensa do dereito á vivenda”.
Ao fío diso, referiuse a a promoción municipal de vivenda en aluguer ou o impulso á rehabilitación. Tamén, recalcou o “compromiso” co idioma galego e coa cultura ou outros acordos relativos ao “impulso da área metropolitana” e o “futuro do porto e a fachada marítima”.
CRÍTICAS DO PP
Pola súa banda, o portavoz do grupo municipal do PP, Miguel Lorenzo, denunciou, nun comunicado, “falta de ambición” entre os socios do goberno municipal “porque o BNG anunciou 80 medidas e nós 600”. “De que vale que digan que teñen o orzamento máis alto se logo non o executan?”, pregúntase tamén ao asegurar que no anterior mandato “deixáronse sen executar 180 millóns para obras e en agosto deste ano tiña 60 millóns máis”.
