O Xulgado de Violencia sobre a Muller acordou o ingreso en prisión provisional comunicada e sen fianza para o detido o luns na cidade da Coruña por agresión con arma branca á súa parella.

Así o informou o Tribunal Superior de Xustiza de Galicia (TSXG) que explica que está investigado por un delito de homicidio en grao de tentativa ou de lesións agravadas, algo que se determinará ao longo da instrución.

Ademais, ditouse unha orde de protección con respecto á vítima, que inclúe afastamento, para o caso de que saíse de prisión, e prohibición de comunicación.

Como medidas civís, acordouse garda e custodia dos fillos menores á nai, pensión alimenticia, prohibición de visitas e atribución do uso do domicilio para a nai.

O suceso produciuse na rúa Tornos e ao lugar desprazáronse varias unidades policiais. A muller foi ingresada no complexo hospitalario universitario da Coruña, con ferida no abdome e evolución favorable, tras o seu ingreso na unidade de coidados intensivos (UCI).