A Marea Atlántica elixiu por unanimidade unha nova coordinadora para construír “de abaixo a arriba” unha alternativa de face ás eleccións municipais de 2027.

Así o informa despois de que a asemblea da formación municipalista completase este mércores o proceso de renovación interna anunciado tras os comicios de maio.

Doce persoas conforman o equipo paritario que se fará cargo de “recuperar o pulso nunha nova etapa que pasa pola celebración, a medio prazo, dunha Marea Viva”, apuntan sobre o equivalente, no seu caso, a un congreso ou conferencia política.

O novo equipo, que inicia agora un mandato de dous anos, está composto por Xan Xove, Xema Rivera, Rodrigo Gil, Marta Cortacans, Iván Núñez, Eva García, Mariano Fernández, Mariló Candedo, Miguel Garea, Vitoria Mejuto, Ahmad Sagir Matar e Elena Amiano. Só catro persoas repiten neste órgano.