Pablo, Etienne, Hugo e Lorena foron os encargados este ano de prender os máis de 3.350.000 puntos led (de baixo consumo), de toda Coruña. Foi no marco dunha ridícula gala celebrada no Obelisco, que se alongou e se alongou colmando a paciencia dos que pensaban que o acendido sería ás 18:30h.

Foi o mago Cayetano Lledó o que abríu a gala cun espectáculo moi navideño, sacando as risas dos máis pequenos cos trucos de maxia, e coa súa actuación clave clown, na que reinvidicou o papel dos persoeiros “invisibilizados” do Nadal, como o cervo Rudolf, O Grinch andaluz, ou o arxentino Rodolfo Langostino.

Lledó deu paso ao xornalista Pablo Portabales, como mestre de cerimonias, que xunto á alcaldesa fixeron o que puideron para aguantar a espera, cambiando de galego a castelán sen moito rigor, ata o acendido. A alcaldesa escolleu dous debuxos ao azar e os dous nenos agraciados foron os encargados de pulsar o botón que activou as luces de Nadal.

Aí foi o acendido do alumeado de Nadal da Coruña. pic.twitter.com/w7RjDn5rvC

— Xornal da Coruña (@xornaldacoruna) December 1, 2023

Este ano o Nadal coruñés conta con 3.350.000 puntos led de baixo consumo, repartidos en 534 arcos. Hai decorados nos diferentes barrios 198 farois, 53 árbores e un total de 222 rúas con iluminación. Ademais, A Coruña volve a contar coa árbore luminosa de 20 metros do Obelisco e coa bóla de 12 metros da Mariña. Este venres comezou a actividade tamén nas atraccións da praza de María Pita.