A alcaldesa da Coruña, Inés Rey, reprochou ao PP buscar “confrontación política” con debates “alleos” ao pleno municipal tras o sucedido este xoves nunha sesión plenaria na que expulsou ao portavoz municipal popular, Miguel Lorenzo, tras chamalo á orde tres veces por intervención fóra da quenda de palabra.

A preguntas dos xornalistas, coincidindo coa rolda de prensa que ofreceu este venres para presentar a carreira San Silvestre, apelou ao “clima de respecto” do anterior mandato. Por iso, manifestou que non consentirá que unha sesión plenaria “se convirta nun circo” ou que haxa “faltas de respecto”, dixo tras unha decisión que xurdiu ao fío do cruzamento de declaracións entre o portavoz local, José Manuel Lage, e edís populares, entre eles Lorenzo, xa na quenda de preguntas.

Por outra banda, volveu a pedir ao PP — que criticou no pleno, entre outras cuestións, os acordos sobre a amnistía– que reflexionen. “Dáme pena que o principal partido da oposición non teña nada que dicir da cidade, que falen doutras cousas”, apostilou. Tamén dixo entender que se fagan referencias “puntualmente” á política de Madrid, pero engadiu que “unha cousa é iso e outra falar de temas que son alleos ao municipal e no ton no que se fai”. E é que para a rexedora o PP buscou “a provocación e a crispación”. “Polo barranco da demagoxia non nos imos a ir con eles”, apostilou.

RESPOSTA DO PP

Pola súa banda, o presidente do PP provincial da Coruña, Diego Calvo, mostrou a súa sorpresa polo posicionamento da alcaldesa, ao ser preguntado por esta cuestión nun acto na cidade herculina. “Creo que non se decataron moi ben das declaracións do noso portavoz, se cadra estaban nerviosos“, expuxo ao rexeitar os argumentos esgrimidos no pleno por parte dos socialistas.

Na mesma liña dixo que por parte da dirección do partido estase “moi orgulloso” do traballo do grupo municipal. “Moitos cidadáns estan desexando escoitar a representantes políticos dicir a verdade e non falseando a realidade”, sentenciou.