A sección cuarta da Audiencia Provincial da Coruña decretou o mantemento da garda de feito dunha avoa sobre a súa neta, que ten seis anos, e outorgoulle facultades tutelares mentres se manteña a situación actual.

Ademais, segundo informa o Tribunal Superior de Xustiza de Galicia (TSXG), fallou que non procede establecer un réxime de visitas a favor da nai da menor. Desta forma, a Audiencia estimou o recurso de apelación interposto pola avoa da nena contra unha sentenza ditada polo Xulgado de Primeira Instancia número 10 da Coruña.

Na resolución, o tribunal explica que consta acreditado que a nai da menor padece “un trastorno bipolar, un trastorno límite de personalidade”, así como que é toxicómana, “polo que non se atopa en condicións de atender á súa filla, como xa ocorreu coa súa outro fillo, cuxa garda e custodia foi outorgada á agora demandante — a súa avoa — ata que este ano cumpriu a maioría de idade”.

Os maxistrados indican que, en xuño de 2020, a nai da menor pediu axuda á súa proxenitora para que se fixese cargo da nena e outorgou un poder notarial a favor da súa nai e da súa irmá para que puidesen realizar as xestións necesarias para a escolarización e asistencia sanitaria da nena, así como o seu traslado á Coruña.

“Ata a data actual, a demandante coidou dos seus dous netos, exercendo as súas funcións de garda e custodia, sen que volvesen a ter contacto coa súa nai, quen non foi privada xudicialmente da patria potestade, aínda que puidésemos entender que concorrerían os requisitos para acordar a súa privación ou suspensión”, subliña a Sala.