A sección primeira da Audiencia Provincial da Coruña absolveu do delito concursal de insolvencia punible ao administrador dunha empresa, na actualidade liquidada, e a un profesional vinculado coa actividade mercantil que constituía o obxecto da compañía. Faino, segundo informa o Tribunal Superior de Xustiza de Galicia (TSXG), ao considerar que non consta que ambos levasen a cabo entre 2011 e 2013, “de maneira individual ou conxunta e en execución dun plan previamente convido”, operacións “alleas á lóxica empresarial, en prexuízo da situación patrimonial da compañía”. “Ata colocala nunha situación deficitaria en prexuízo dos seus acredores, que non puideron lograr a satisfacción dos seus créditos en todo ou en parte”. A sentenza non é firme xa que cabe recurso contra a mesma.