A sección primeira da Audiencia Provincial da Coruña absolveu a un home acusado de agredir sexualmente e de roubar a súa ex parella no transcurso dun encontro nun hotel.

En concreto, o tribunal considera probado que ambos mantiveron unha relación sexual nunha habitación de hotel pero cren que non se acreditou de forma suficiente que fóra non consentida, con emprego de violencia e intimidación por parte do acusado.

“Non consideramos que a denunciante faltase á verdade, senón que albergamos dúbidas sobre o realmente acontecido, o que determina a aplicación do principio in dubio pro reo”, explican os maxistrados, quen lembran que esa regra impón ao xuíz “o non afirmar feito algún que poida dar lugar a un pronunciamento de culpabilidade se se albergan dúbidas sobre a súa certeza”.

A Audiencia indica que o relato de feitos do escrito de cualificación non “colma as esixencias do tipo” delituoso que se lle atribúe, á vez que subliña que tampouco se acreditou a concorrencia do elemento obxectivo nin a concorrencia do imprescindible ánimo de lucro no acto de apoderamento que se lle atribúe. A sentenza non é firme, pois cabe presentar recurso ante o TSXG.