Axentes da Policía Nacional, nunha operación conxunta coa Policía Federal de Brasil, detiveron a dúas persoas en Oviedo e liberaron a seis vítimas de explotación sexual en Lugo, Oviedo, Zaragoza, A Coruña, Málaga e Brasil. A operación permitiu desarticular unha organización que captaba a mulleres de orixe brasileira para a súa explotación sexual.
A banda criminal, segundo indicaron desde a Policía Nacional, estaba asentada en Galicia e Asturias e dedicábase á trata de mulleres.
Os seus integrantes captaban ás súas vítimas en Brasil mediante falsas promesas de traballo e chegaron a falsificar certificados Covid cando eran requiridos para a entrada en territorio nacional. Despois, impúñanlles un control absoluto sobre as vítimas, ás que arrebataban os teléfonos, a documentación e encerraban nunha casa de citas para forzalas a exercer a prostitución.
Unha vez en España, esixíase unha débeda de 10.000 euros que se incrementaba exponencialmente, mediante a imposición de ‘multas’ pola súa manutención e aloxamento en domicilios empregados a modo de prostíbulo ou casas de citas e calquera atraso no cumprimento das normas que lles impuñan.
Forzaban ás súas vítimas a exercer a prostitución, e sometíanas a ameazas e violencia, ademais de fornecelas sustancias estupefacientes para que llas ofrecesen aos clientes.
Ademais, eran trasladadas dun lugar a outro para a súa explotación sexual, coa intención dos implicados de rotar as mulleres en diferentes cidades como Ourense, Vigo, Coruña e outros municipios, desta maneira, obtiñan máis diñeiro co que satisfacer a débeda adquirida.
Unha vez que a organización consideraba que as vítimas saldaran a súa débeda, a organización criminal expulsábaas da casa na que se atopasen nese momento e deixábaas á súa sorte en territorio español.
INVESTIGACIÓN POLICIAL
O operativo iniciouse por mor dunha denuncia da Asociación de Travestis e Transexuais da Provincia brasileira de Goiás, a través da Agregaduría de Brasil, pola que se puxo en coñecemento das autoridades que mulleres brasileiras estaban a ser vítimas de trata con destino a España.
A investigación logrou pór ao descuberto a banda criminal con vínculos afectivos e familiares e unha forte infraestrutura, dado que os membros da organización estaban especializados en áreas delimitadas como a captación, recepción e acollemento. Explotaban sexualmente a mulleres e transexuais vulnerables, a quen enganaban coa promesa de realizar un traballo diferente á prostitución e ben remunerado.
O operativo policial culminou coa liberación de seis vítimas de explotación sexual en Lugo, Oviedo, Zaragoza, A Coruña, Málaga e Brasil e o arresto de dúas persoas en Oviedo, polos delitos de trata de seres humanos con fins de explotación sexual, relativos á prostitución, contra a saúde pública, ameazas graves, branqueo de capitais, contra os dereitos dos cidadáns estranxeiros, falsidade documental e pertenza a organización criminal.
Máis novas
