Case 600 persoas participarán na Cabalgata de Reis da Coruña, prevista para este venres 5 de xaneiro, ás 18.00 horas. A comitiva estará formada por 14 carrozas, 5 trens e 17 compañías artísticas e de animación. A mesma, explica o goberno local, sairá do Barrio das Flores, fronte do CEIP Ramón da Sagra, e terminará como cada ano na praza de María Pita co saúdo das súas maxestades, ao redor das 21.15 horas.
Aos 235 nenos e nenas que participarán como figurantes nas carrozas da Cabalgata súmanse un total 362 persoas que forman o dispositivo loxístico e de seguridade. O Concello conta con 231 persoas para traballos de carácter técnico e loxístico, tanto nos puntos accesibles e sen ruído, así como de monitorado dos nenos e nenas figurantes. Os máis especiais, os Bombeiros!
Percorrido da Cabalgata de Reis Magos 2024
A Cabalgata de Reis 2024 partirá do Barrio das Flores con saída na rolda Camilo José Cela, fronte ao CEIP Ramón de la Sagra, ás 18.00 horas cara a avenida de Monelos. O percorrido continúa por Alcalde Pérez Ardá ata a travesía de Fernández Latorre seguindo cara Catro Camiños e A Palloza para chegar á praza de Ourense por Linares Rivas. Despois continuará polos Cantóns e a avenida da Mariña ata Porta Real, rematando a cabeza da cabalgata aproximadamente ás 20.30 h na praza de María Pita. Ás 21.15, aproximadamente, os Reis Magos saudarán desde o Palacio Municipal a todos os nenos e nenas presentes na praza.
Dispositivo especial de tráfico do Concello da Coruña para a Cabalgata de Reis
