O achegamento da borrasca Irene deixará ventos fortes en Galicia, tanto en terra como en mar, e choivas intensas en zonas da Coruña e no sur de Ourense durante a tarde-noite deste martes.
Así, Meteogalicia activou a Alerta Laranxa por vento do sur forza 8 no litoral da Coruña –Noroeste e Costa da Morte — e nas Rías Baixas, entre as 18,00 horas deste martes e as 00,00 horas do mércores.
Ademais, mantén activo o aviso amarelo en toda Galicia desde as 15,00 horas por ventos de sur-suroeste con refachos de máis de 70-80 quilómetros por hora.
Haberá tamén mar combinado do suroeste con ondas de ata 6 metros.
En canto ás choivas, o aviso amarelo esténdese ao oeste e suroeste da Coruña e ao sur de Ourense, por acumulacións de 40 litros en 12 horas. No caso da provincia da Coruña o aviso está activo entre as 15,00 horas e as 00,00 horas, mentres que en Ourense será entre as 21,00 horas e as 09,00 horas.
Sobre o aviso amarelo por ondas na Costa da Morte e nas Rías Baixas, Meteogalicia prevé ondas de catro a cinco metros durante a noite e ata as 09,00 horas do mércores.
