Aitana, Louis Tomlinson, Yandel, Nicki Nicole, Dani Fernández e Sen Senra están entre os primeiros artistas confirmados para a Morriña Festival, que se celebrará este ano na Coruña e para o que as entradas sairán á venda o próximo 23 de xaneiro, ás 13.00 horas. “Este festival será de novo unha das grandes citas musicais de Galicia e do país”, sentenciou a alcaldesa, Inés Rey, na presentación desta nova edición no consistorio coruñés.
A rexedora estivo acompañada no acto polo concelleiro da área de Fomento e Promoción da Cidade, Gonzalo Castro; polo xerente de Turismo de Galicia, Antonio Casas; por Joaquín Martínez, mercadotecnia manager de Estrella Galicia e Esteban Girón, responsable de prensa do festival.
A alcaldesa remarcou que non se entende o verán coruñés sen un festival que nas súas dúas edicións anteriores congregou a unhas 50.000 persoas no estadio de Riazor e 40.000 no porto. No festival, tamén estarán Dorian, Enol, Malmö040, Yeico x Toni, Garabatto, Dollar Selmouni e Trashi, entre outros. Nas próximas semanas anunciaranse novos artistas.
