O expresidente do Goberno José Luís Rodríguez Zapatero reafirmou este venres o seu apoio á Lei de Amnistía pactada polo PSOE cos partidos independentistas e, ademais, asegurou que o momento actual é o mellor da historia de España. Así o sinalou na apertura da Convención Política que os socialistas celebran este fin de semana na Coruña.
“Si, son un firme defensor da amnistía porque creo na democracia da xenerosidade, da convivencia, do volver empezar”, asegurou no arranque desta convención, na que o PSOE pretende actualizar o seu ideario político para o próximos catro anos de lexislatura.
Ante 1.200 delegados, incluída boa parte da dirección do PSOE e os baróns territoriais –o secretario xeral, Pedro Sánchez incorporarase este sábado– defendeu ademais que o momento actual, os anos 2023 e 2024, “é o mellor da historia de España”, porque, segundo indicou, non hai terrorismo, hai un Goberno sen corrupción, hai niveis de emprego marca e as empresas teñen beneficios máis elevados que nunca. “E engado, un Goberno ao que non lle declararon a independencia en ningún territorio do país”.
Ademais, refugou o argumento de que rompe España e de que os socialistas están sometidos a unha chantaxe e cedendo ante o independentismo e reivindicou ao seu partido como “a columna vertebral da Constitución desde 1878 en España” porque “estivo en todos os grandes pactos e reformas” .
Máis novas
O PSOE acometerá cambios “cirúrxicos” na Executiva Federal, ademais de nomear nova portavoz
