A Coruña acollerá o domingo 12 de maio o musical ‘A tu lado’, da banda Los Secretos. Trátase dun concerto teatralizado que repasa os máis de 40 anos de actividade da formación madrileña. O espectáculo está promovido polo Concello da Coruña e as entradas xa están á venda a través de Ataquilla, segundo informa o consistorio.
O musical terá un formato íntimo no que se narrarán diferentes confidencias da banda ao longo da súa traxectoria, repasando as principais cancións do seu repertorio.
A formación ao completo, liderada por Álvaro Urquijo, estará sobre o escenario para pór música ao espectáculo. A escenografía tamén xogará un papel importante pois recreará un camerino, un bar, unha sala de estar e un escenario dun concerto, completado cunha imaxe nocturna de Madrid, cidade de orixe da banda, como fondo.
