A Autoridade Portuaria da Coruña acaba de licitar o servizo de asistencia técnica para a coordinación de seguridade e saúde nas obras da rede ferroviaria interior de Punta Langosteira e nas de habilitación do sistema de control, mando e sinalización.

As empresas interesadas en prestar este servizo teñen de prazo ata o 22 de febreiro para presentar as súas ofertas. O orzamento máximo estableceuse en 182.522 euros para un traballo que se desenvolverá durante 26 meses, ata mediados do ano 2026, segundo informa.

Na actualidade están a executarse as obras da ligazón ferroviaria do porto exterior coa rede xeral. Dado que concluirán ao longo de 2026, a Autoridade Portuaria adxudicará nas próximas semanas as obras da rede interior da dársena cun orzamento de 27 millóns de euros.

“De forma que estean terminadas no mesmo prazo”, engade. Ademais, avanza que proximamente se licitará o proxecto do sistema de control, mando e sinalización (CMS) da rede, que comprende a instalación da sinalización, balizamento, protección e telecomunicacións das vías, para garantir a explotación en condicións adecuadas.