Persoal do grupo Arriva mobilizouse na estación de autobuses da Coruña para denunciar o “envellecemento” da frota de vehículos da compañía e o risco que supón para “a seguridade” de condutores e usuarios. Tamén para esixir á Xunta que “tome medidas no asunto”.

Foron unha vintena de traballadores os que protestaron este xoves nunha das dársenas da estación coruñesa tras unha pancarta coa lema ‘CIG pola seguridade nos buses, Grupo Arriva’. “Esta concentración é un toque de atención para a empresa, esperemos que tome medias senón continuaremos coas mobilizacións”, anunciou o responsable de transportes da CIG, Xesús Pastoriza.

“É un auténtico desastre, a antigüidade dos autobuses e as avarías permanentes, é un tema moi urxente de solucionar para evitar que haxa un accidente con vítimas”, dixo. Un feito que, segundo insistiu, “afecta tamén a outros grupos empresariais” do sector. “As queixas dos traballadores son en todos os lados”, asegurou.

Respecto da antigüidade da frota en Galicia, composta por “aproximadamente 150 autobuses”, Pastoriza indicou que “debe estar por encima dos 12 anos cando deberían estar entre o seis e o oito”.