A pasarela de Pedralonga, na avenida de Alfonso Molina e entre os barrios de Palavea e Eirís, quedou aberta desde este venres, con presenza do delegado do Goberno, Pedro Blanco, e a alcaldesa, Inés Rey.

Situada no punto quilométrico 3+550 da AC-11, facilitará o acceso dos veciños dunha zona á outra e mellorará a “seguridade viaria”, segundo expuxeron ambos tras un percorrido pola pasarela con presenza tamén da subdelegada do Goberno, María Rivas, e o portavoz do goberno local, José Manuel Lage.

A rexedora incidiu en que se trata dunha pasarela moi “demandada” polos veciños e destacou a seguridade que implicará para cruzar dunha zona a outra. O delegado do Goberno remarcou, á súa vez, o investimento de 1,4 millóns e o servizo que prestará tanto desde o punto de vista de accesibilidade como de seguridade.