Dúas persoas precisaron asistencia médica este xoves na Coruña tras respirar fume dun incendio rexistrado na súa vivenda, na cidade herculina.

O 112 Galicia recibiu a alerta sobre as 14,30 horas. As testemuñas apuntaban que había fume no oco das escaleiras e zonas comúns dun edificio da Rúa Venezuela, e que escoitaban “xente berrar”.

Para facer fronte a esta situación, os xestores do Centro Integrado de Atención ás Emerxencias de Galicia activaron aos Bombeiros da Coruña, a Policía Local e Nacional e os profesionais de Urxencias Sanitarias de Galicia-061, aínda que, naquel momento, descoñecíase a presenza de persoas feridas.

Finalmente, o equipo médico trasladou a dous ocupantes da vivenda ao Hospital da Coruña con síntomas de inhalación de fume. Ambos trataron de apagar o lume polos seus propios medios.

Á súa chegada, os bombeiros centraron a súa actuación en finalizar de sufocar as chamas, que danaron a campá extractora da cociña, e de ventilar tanto a vivenda afectada como as zonas comúns do edificio.