A área de Deportes da Deputación da Coruña destina 270.000 euros a unha vintena de municipios da área de Santiago para a contratación de técnicos deportivos.

O deputado responsable desta área, Antonio Leira, visitou o centro deportivo Juanito Amigo, no municipio coruñés de Oroso, onde supervisou algunhas das actividades que se desenvolven na localidade, unha do vinte que contan cun técnico deportivo contratado coas axudas que a institución provincial destina a este fin.

Tal e como trasladou a Deputación nunha nota de prensa, Leira destacou nesta visita que se destinaron este ano 904.000 euros ao financiamento deste programa, que permitirá a 67 concellos da provincia contratar ou manter no seu cadro de persoal a técnicos deportivos “que teñen como misión dinamizar a actividade deportiva dos municipios e planificar un calendario de actividades para todos os públicos”.

Ademais, o deputado sinalou que se trata dun programa que “contribúe de maneira directa á xeración de 62 empregos noutros tantos municipios da provincia” e “facilita a realización de programacións deportivas con actividades variadas e estables, promovendo a práctica do deporte e a actividade física entre os veciños de todas as idades nos concellos da provincia”.