A terceira e última fase da Casa Veeduría na Coruña, que permitirá ampliar o centro cívico da Cidade Vella e crear un centro de día no barrio, comezou xa, segundo informou a alcaldesa, Inés Rey, nunha visita ás dependencias.
Foi xunto ao concelleiro da área de Economía e Planificación Urbana, José Manuel Lage, e o edil de Urbanismo, Rehabilitación Urbana e Vivenda, Francisco Díaz Galego.
Trátase dunhas obras que permitirán restaurar un inmoble de alto valor patrimonial, construído no século XVIII e reformado nos primeiros anos do século XX.
A remodelación da Casa Veeduría, que comezou no tramo final do pasado mandato, permitirá ampliar as instalacións do centro cívico, coa creación dun centro de día, unha sala de estudos, un auditorio, unha sala de exposicións e unha zona de xogos para os mozos.
“A revitalización do barrio pasa por iniciativas como esta, coa que recuperamos espazos históricos da Cidade Vella e abrimos as súas portas á cidadanía”, expuxo a rexedora en relación a unha intervención que se prevé terminar este ano.
