A asociación cultural O Mural, unha das entidades que alertou da situación dos murais de Urbano Lugrís situados nun antigo restaurante da rúa Olmos, na cidade herculina, manifestou que a “maneira máis rápida” de incoar a declaración como Ben de Interese Cultural (BIC) dos mesmos é admitir a solicitude formal que fixo en decembro de 2022.
Nun comunicado, e ante o interese de compra da Xunta dos mesmos — ao atoparse a propietaria, unha empresa privada, en concurso de acredores con bens á venda –, e sobre os pasos dados agora para a declaración BIC, cuestiona que non se fixera antes. “Cantos meses ou anos teremos que seguir esperando”, sinalan os representantes da asociación, que lembran que en 2022 fixeron unha solicitude formal a esta respecto da Xunta.
Neste sentido, denuncia “desinterese” e “silencio administrativo” á súa petición e engade que iso pode ser “emendado” se se admite a solicitude que presentaron. “Que se fundamentaba en que os frescos constitúen o único conxunto muralístico pintado por Urbano Lugrís que se conserva íntegro no lugar no que foi pintado”, engade.
