As últimas sondaxes arqueolóxicas levados a cabo na ladeira sur do Castro de Elviña desvelan novos achados de cerámica romana e proxectís de granito, segundo informa o consistorio da Coruña. As escavacións executadas a comezos de ano inciden na posibilidade dunha fase de asedio ao Castro, que deberán agora corroborar as probas científicas.

A finais de xaneiro promoveuse unha campaña financiada polo Centro de Investigación das Paisaxes Atlánticas Culturais baixo a dirección do investigador Samuel Nión Álvarez. Ao amparo do proxecto ‘As dúas vidas dos poboados fortificados’, entre os días 22 e 29 de xaneiro acometéronse escavacións na coñecida como a ‘Terraza Sur’, un promontorio situado a menos de cen metros do Castro, fóra do espazo amurallado.

Nas sondaxes realizadas a comezos de ano identificouse unha gabia lonxitudinal de máis dun metro de anchura, onde se atoparon fragmentos de cerámica romana e unha esfera de granito de 5,6 quilos, semellante aos proxectís da época romana que, polas súas características, podería encaixar co sistema de pesos e medidas da Roma republicana.