O grupo de folk Milladoiro celebrará os seus 45 anos de historia cun concerto especial na Coruña o 19 de maio, que se celebrará no Palacio da Ópera. O concelleiro da área de Fomento e Promoción da Cidade, Gonzalo Castro, presentou o evento acompañado por integrantes do grupo e da promotora, Thinking Up Events.
“Todo comezou nunha cafetaría da rúa Feijóo, onde se decidiu o nome da banda, e tivo o seu lanzamento definitivo co concerto nos Salesianos, o 15 de maio de 1979”, sinalou Gonzalo Castro na súa intervención.
O debut de Milladoiro foi na cidade da Coruña, no auditorio dos Salesianos e organizada polo Ateneo. 45 anos despois ofrecerán un recital especial cun repertorio único, segundo expuxeron.
