A alcaldesa da Coruña, Inés Rey, considerou que deben ser os expertos os que determinen a futura localización dos murais de Urbano Lugrís, situados nun antigo restaurante da rúa Olmos e que se atopan en venda tras entrar a empresa propietaria dos inmobles onde están en concurso de acredores.

Fíxoo a preguntas dos xornalistas tras informar os asuntos aprobados en Xunta de Goberno e ao ser cuestionada pola incoación por parte da Xunta para declarar, na categoría de monumento, como Ben de Interese Cultural (BIC) os citados murais. A rexedora destacou o que xa estean “protexidos” e reivindicou o “traballo conxunto” de Xunta e Concello da Coruña “para que quedasen na cidade nas mellores condicións e para que estivesen protexidos”.

“Traballamos dunha maneira exitosa”, apuntou a alcaldesa, que destacou a cooperación entre ambas as administracións “con rigor, e con seriedade”. Cuestionada sobre se deberían quedar na súa actual localización ou ser trasladados ao Museo de Belas Artes, como propón a Xunta, que opta á súa compra, xunto a un particular e unha empresa no proceso de venda (cuestión que deberá decidir un xulgado), remitiuse ás decisións que poidan adoptar a este respecto os expertos da Dirección Xeral de Patrimonio.