O Museo Casares Quiroga da Coruña expón unha mostra de humor gráfico, da arxentina Diana Raznovich, dentro dos actos programados polo consistorio con motivo da conmemoración este venres do Día Internacional da Muller. Trátase da exposición ‘Imparables’, en chave feminista, e que estará aberta ás visitas ata o próximo 31 de marzo no citado museo.
A rexedora, Inés Rey, acompañada da concelleira da área de Benestar Social, Yoya Neira, presidiu o acto de apertura da exposición.
“Desde o Concello continuaremos promovendo actividades que reivindican a figura da muller e a importancia de que teña o mesmo peso en todos os ámbitos”, sinalou durante a súa intervención, apuntando que o 8 de marzo é “un día de reflexión, pero tamén de acción” para avanzar cara a igualdade.
