O Concello de Bergondo alertou de que a ruptura dunha tubaxe de auga na AC-162, ao seu paso por Gandarío, “agrava os problemas” da erosión do terreo. Segundo detallou o consistorio municipal, nos últimos anos alertou tanto á Demarcación de Costas como á Xunta do desgaste que se produce na marxe dereita da vía na zona da Lagoa.
Este domingo, debido á avaría, eses problemas, que afectan as beirarrúas, completamente levantadas e ao firme da estrada, que ten “unha gran fisura”, agraváronse. No punto traballan os operarios de Viaqua para solucionar a ruptura na rede de abastecemento e ata o lugar tamén se desprazou Protección Civil de Bergondo.
O Concello deu aviso á Xunta para que acudan a avaliar os danos e urxiu, tanto á Demarcación de Costas como ao Executivo galego, que tomen medidas “dunha vez por todas” para garantir a seguridade no punto. Pola súa banda, a administración local “valida” o proxecto de renovación das beirarrúas para executalo cando se “solucionen eses graves problemas”.
