O grupo de investigación Neurociencia e Control Motor da Universidade da Coruña (UDC), do Centro Interdisciplinar de Química e Bioloxía, foi premiado coa distinción ao mellor proxecto de investigación básica en epilepsia Epiforward 2024.

Así o informa o reitorado coruñés que lembra que se trata duns premios que promove a Federación Española de Epilepsia, que recoñecen a investigación da enfermidade, ademais de impartir conferencias e sesións de traballo.

O equipo observou, despois de anos de traballo en técnicas de neuromodulación, como eran capaces de reducir a actividade cerebral grazas á aplicación de campos magnéticos en áreas concretas do cerebro.

O traballo busca aplicar campos magnéticos de forma xeneralizada nas cabezas dos pacientes mediante o deseño dun casco que poida abordar varias áreas do cerebro á vez.