Unha muller resultou ferida, cunha queimadura e intoxicación por fume, ao arder a súa cociña, segundo informa o 112 no seu parte de incidencias.

Poucos despois das 15,00 horas desta tarde, o 112 Galicia tivo constancia dun incendio na rúa da Mercé, despois de que un particular chamase para informar disto. Ao mesmo tempo, o alertante indicaba que había unha persoa dentro da cociña onde se estaba producindo o lume.

O 112 Galicia pasou o aviso ao Servizo de Urxencias Sanitarias de Galicia-061, Bombeiros da Coruña, Policía Nacional, Policía Local e Agrupación de Voluntarios de Protección Civil da cidade.

O incendio foi sufocado polos particulares ao facer uso dun extintor. Con todo, isto non puido evitar que ardese tanto a cociña como os mobles do seu interior.

Da mesma maneira, a muller que se atopaba na cociña no momento no que se produciu o lume tamén se viu afectada, polo que os servizos sanitarios procederon ao seu traslado.