O goberno local de Cambre espera pagar as axudas pendentes das Anpas do municipio coa liquidación das contas de 2023. Así o sinala nun comunicado tras a reunión que a concelleira de Economía, María Pan, e a edil de Educación, Ana Rodríguez, mantiveron con representantes das asociacións de nais e pais.

Sobre a mesma, sinala que se explicou aos representantes das asociacións que os pregos do servizo de limpeza de instalacións municipais están, actualmente, pendentes de informe por parte do departamento de Contratación, dependente de Secretaría. Ademais, as concelleiras explicaron que a intención era abonar as subvencións pendentes coa liquidación do orzamento do 2023, “un trámite no que se está traballando desde o departamento de Intervención”.

“Para minimizar as molestias da comunidade educativa e dos usuarios e o persoal do centro de saúde, o goberno local solicitou un reaxuste das horas de limpeza do persoal da empresa, priorizando a realización destas tarefas nos colexios e no centro de saúde de Cambre“, sinala o goberno local tras unha protesta de pais e nais.