Celebrouse onte o Día Mundial da Síndrome de Down, e o lugar ideal para facelo na nosa cidade é na praza de Ourense. O Quiosco Down Experience, que xestiona a asociación Down Coruña, é un dos mellores exemplos de “inclusión e a igualdade de oportunidades” como recoñeceu na visita realizada pola subdelegada do Goberno na Coruña, María Rivas.

Acompañada polo vicepresidente da asociación Down Coruña, Enrique Pena, o director executivo, Manuel Rego, e varios dos seus usuarios e traballadores, quixeron poñer en valor un dos bares máis míticos da cidade, xestionado dende hai anos pola entidade no que traballan persoas con e sen discapacidade “que supón un exemplo inmellorable de como se pode conseguir a plena inclusión do colectivo nos ámbitos social e laboral”.

Para os que aínda non volvestes, os míticos bocadas de calamares do quiosco da Praza de Ourense segue sendo dos mellores da cidade.

Un día de visibilización

Rivas destacou a importancia de concienciar e sensibilizar á sociedade sobre os dereitos das persoas con esta síndrome e outros tipos de discapacidade intelectual para conseguir a súa plena inclusión, tanto no ambiente social como no laboral.

A subdelegada deu cifras e informou de que en Galicia hai case 74.000 persoas en situación de dependencia recoñecida nalgún dos tres graos de protección, o nivel mínimo, o acordado e o adicional, tal e como recolle a Lei de Dependencia. “Todas e cada unha destas persoas necesitan un Goberno como este, que os apoie e que lles proporcione ferramentas útiles que contribúan á mellora da súa vida e a das súas
familias”.