Delegadas e delegados de Froiz da provincia da Coruña mobilizáronse este mércores ante o supermercado desta empresa situado en Santa Cruz, no municipio de Oleiros, para denunciar que a compañía “nega a posibilidade de gozar de vacacións nos meses de verán” neste establecemento. Explican que Froiz se xustifica “coa escusa de que este supermercado está situado nunha zona de gran afluencia turística”.

Segundo informa a CIG, esta organización sindical leva “moito tempo” demandando a esta empresa o dereito dos empregados de poder gozar de parte das súas vacacións durante o verán “en todos os centros de traballo”. Recalca que este feito “é un dereito, non un capricho”.

Lembra, ademais, a “obrigación” da compañía de “aumentar a contratación” para permitir atender as “necesidades de conciliación” dos traballadores e traballadoras e subliñan que “non hai nada que impida ter vacacións no verán”.