A alcaldesa da Coruña, Inés Rey, ofreceu diálogo aos veciños das Casas de Franco ante as súas protestas polas obras de humanización que está a executar o consistorio para expresar o seu rexeitamento por actuacións previstas.

“Dialogamos, hai cambios no proxecto e sentareime con eles”, sentenciou a rexedora, a preguntas dos xornalistas, nas que incidiu en que se trata dun barrio que leva “moitos anos sen investimentos”. “Explicóuselles a obra e aceptamos suxestións”, engadiu ao limitar o muro ao que aluden a unha actuación de “40 centímetros”.

Mentres, preguntada pola decisión municipal de non permitir a apertura do establecemento de Primor, na Coruña, ao non ter autorizadas as obras, expuxo que “non tiñan licenzas para facelas e tampouco de apertura”. “Decidiron facer as obras e abrir de forma unilateral, notificóuselles que teñen que adaptar a obra á normativa”, reiterou.

Por outra banda, o consistorio informou que este mércores comezan as obras de reurbanización de San Andrés entre Santa Catalina e a rúa Sol, que suporán o corte do tráfico rodado neste sector.