Piden 10 anos de cárcere para dous homes acusados de delitos de estafa e distribución de moeda falsa na Coruña, que supostamente distribuíron dólares falsos. O caso procede do Xulgado de Instrución nº7 da Coruña e xulgarase o próximo 9 de abril ás 10,00 horas na sección segunda da Audiencia Provincial da Coruña.
Segundo recolle o Ministerio Fiscal no seu escrito de cualificación, os dous acusados estableceron amizade en 2019, cando coincidiron cumprindo condena no Centro Penal de Teixeiro. Unha vez que quedaron en liberdade e dado que a situación dun deles era moi precaria, en 2020, “puxéronse de acordo para introducir e/ou distribuír distintas cantidades de dólares ilexítimos e/ou enganosos”.
Con este obxectivo, cando un dos acusados tivo no seu poder os dólares, decidiu darlles saída de forma indirecta, “valéndose de terceiras persoas para introducilos a través de diferentes entidades bancarias”.
Concretamente, a súa parella realizou un cambio de divisas/dólares no BBVA, en 2021, por importe de 1.500 dólares, en billetes de 100. A parella descoñecía que non era moeda lexítima.
O mesmo modus operandi seguiu con outro catro coñecidos: dous realizaron compra con moeda estranxeira no BBVA; e outros dous ingresaron cantidades en Abanca e Caixabank. Ademais, o acusado pagoulle a un destes coñecidos, masaxista erótica, un servizo co diñeiro falso.
Por todo iso, a Fiscalía pide 10 anos e un día de cárcere e unha multa de 30.000 euros para cada acusado polo delito de distribución de moeda falsa; e catro meses de prisión polo delito de estafa. Ademais, en canto á responsabilidade civil, o Ministerio fiscal pide que os acusados indemnicen ao BBVA con 250 euros e con 829,59 euros.
