O municipio de Oleiros acolle o 26 de abril unha nova edición da ‘Carreira da Luz’, unha iniciativa promovida nesta ocasión para recadar fondos para un proxecto en Malawi.

Trátase dunha acción impulsada polo IES Miraflores e que, segundo informan os promotores, busca na súa sexta edición destinar a recadación á asociación ‘Pagono Pangono’.

A carreira celebrarase no polígono de Iñás, no municipio de Oleiros. “Unha proba popular que ten como eixo fundamental os valores da solidariedade, o deporte e a convivencia”.

Trátase dunha carreira nocturna na que poden participar persoas de todas as idades, con categorías desde biberóns ata súper veteranos.

Co recadado, apoiarase o proxecto ‘MiniVan Área 49’ co que se pretende dotar dun minibús propio ás alumnas da residencia ‘Amai María’, da área 49 de Lilongwe (Malawi), para que poidan viaxar e continuar a súa formación en centros de secundaria e universidades da capital.