A organización ecoloxista Arco Iris denunciou verteduras ao río Bolaños en Arteixo cun escrito remitido a Augas de Galicia. Ademais, urxe ao concello a cumprir a normativa europea nesta materia. Nun comunicado, afirma que “a pesar das repetidas chamadas de atención desta entidade ao longo dos anos, o concello foi incapaz ata o momento de sanear eficazmente este curso fluvial, que atravesa varios núcleos de poboación”.

“A falta de saneamento das augas fecais pola inexistencia dunha estación depuradora adecuada é a causa de repetidas mortaldades de peixes que aparecen mortos, de cando en vez, na praia de Sabón, onde desemboca a cloaca”. “Estes feitos deben ser inmediatamente corrixidos, pola existencia de directivas europeas que obrigan desde hai tempo a estas pequenas localidades a sanear as súas augas residuais”, incide a organización ecoloxista que demanda a Augas de Galicia que poña fin a unha situación que cualifica de “terceiromundista”.