A International Tattoo Convention comeza este venres no recinto feiral de ExpoCoruña. Trátase da primeira convención internacional de tatuaxe que se celebra en Galicia e reunirá durante tres días, ata o 12 de maio, a un centenar de tatuadores de todos os estilos.
Os asistentes poderán tatuarse en directo cos artistas invitados, baixo cita previa, e gozar das actividades paralelas como sesións de dj, actuacións de rock e de pole dance, ademais de espazos de body painting, maxia ou foodtrucks.
O evento tamén ofrecerá espazos de venda de merchandising, roupa, artesanía e materiais relacionados co sector tattoo, explican.
No evento, está confirmada a participación de artistas procedentes de Portugal, Francia, Polonia, Italia e gran parte de Sudamérica. Todos eles realizarán exhibicións en directo e poderán participar nos concursos diarios que se celebrarán por estilos.
