Mariscadores da ría do Burgo secundaron este venres unha nova protesta con corte de tráfico nos accesos de entrada á cidade da Coruña, o que provocou retencións desde primeira hora da mañá. Foi no marco das mobilizacións que manteñen para esixir ás administracións o pago de axudas unha vez concluídas as obras de dragado para a rexeneración da ría.

O colectivo sostén que aínda quedan actuacións por concluír e que, ademais, hai afectación nalgún banco marisqueo polo que demandan medidas tamén a este respecto, neste caso ao Goberno central.

Por outra banda, reclaman axudas para o tempo no que non poderán faenar, un prazo de ata 24 meses, polo período que debe transcorrer desde que se sementa a cría ata que ten a talla legal para poder recollela.