O conselleiro de Sanidade, Antonio Gómez Caamaño, trasladou a “máxima confianza” no xerente da área sanitaria da Coruña, Luís Verde Remeseiro, e no seu equipo directivo. Fíxoo nunha visita ao Servizo de Radiodiagnóstico e o TAC de baixa radiación que se empregará no complexo hospitalario universitario da Coruña (Chuac) para un programa piloto de cribado de cancro de pulmón e despois de apuntar con anterioridade a posibles cambios nas xerencias do Sergas.

“A semana acaba o domingo”, sentenciou a preguntas dos xornalistas ao ser cuestionado sobre estes cambios. No caso da Coruña, trasladou, non entanto, “máxima confianza” no equipo directivo e o xerente. “As súas liñas, estratexias e obxectivos van cos desta consellería e nada máis”, respondeu. “O domingo acaba a semana”, engadiu ao ser preguntado pola xerencia da área de Santiago.